شِنگ کن:
آس ءِ پولِنگ نہ شُشتاں کَسّا
شودَگا ہم پہ تیار اَت دریا
ارس ہینار اتاں راستیں چمّ ءِ
جُنز ئتاں مُرتاں نہ رستاں جگ ءَ
گْوات ءِ دیدار ءَ گَلاتاں ساہگ
مرچیگیں روچ پہ بہشت اِنت درچک ءِ
تُنّ ءِ ارواہ ءِ جنازہ ایر اِنت
آپ ءِ بِستار نہ گْوستہ راہءَ
بْرانز ءِ بے چاڑیں کَدم تاباناں
اے وڑا زہر نہ گیپت چوں دوزہ
زیمر ءِ واب ءِ کپن ہونین اِنت
کئے بہ زانت کبریں سروز ءِ راز ءَ
چینچو ویران اِنت گَم ءِ تہنائی
زندگی پاد نئیت چہ واب ءَ
بانزلاں گْوت سُرینیت دْرچک ءِ
موسم ءَ کنت کپوتے چنک ءَ
نود نازینک جننت مہرانی
زندگی داریت گَمانی پُرس ءَ
سٔوب سد گنج بہ بیت ارواہ ءِ
جی پہ نازاکیں وپا ءِ زید ءَ
دیدگاں ارس ءِ جتہ کانیگے
بلکنہ تُنّ بہ گیپتیں آپ ءَ