شِنگ کن:
ھزارماہ , ھزار سال, ھزار قصہاں منی
گیاب ءَ کپتگیں شپے
تیابءَ مرتگیں چراگے آں
برے بگند سازے آں
برے بچار نود ششتگیں گلابے آں
رُداں چو آچ سبز باں
مراں چو درچک زرد باں تُنگیں لدءَ
پہ نیزگاریں کوڈی ءَ
من تالح ءِ ھدا
من قسمتانی بادشاہ زادہاں
زھم ءُ اسپ ءِ واجہاں
من پرشتگیں کمانے آں
شکست وارتگیں غریبیں شہر ءِ پسیلے آں
ماں رہسراں تلام مرتگیں سپاہی آں
من شہر شہر جنگلاں
من لوگ لوگ مردماں شمار باں
من ہستءُ نیست ءِ موسماں
من بام ءُ شام ءِ دروشماں
نگاہ ءُ فہم ءِ سیمسراں
ھزار قصہاں منی
ھزار رنگ ءَ اتکگاں,ھزار رنگ ءَ رفتگاں
اے دائمی ءِ تہر تہریں بے کناریں آسمان ءِ ساھگ ءَ
من تہنا اینچو سرپداں
کہ ابد,تئ مہر ءِ آچ شنزیں جمبرانت.. سلامت انت
ازل, مئے تن ءِ جنگل انت..ملامت انت.
٭٭٭٭٭٭٭٭٭٭
گوں منیراھمد کلانچی ءِ منتواری ءَ