شِنگ کن:
دَریں جہانے ٹہیناں گوں پور ءُ استالاں
وت ءَ زمین ءَ رسیناں گوں پور ءُ استالاں
دُرہیں چراگ شپ ءِ جنگل ءَ نپس کَشّاں
مں کلکشانے بلیناں گوں پور ءُ استالاں
چو درچکے ءَ مں وتی اندریں تب ءَ روکاں
زراب ءُ رنگ زریناں گوں پور ءُ استالاں
تنیگہ سنج نہ بوتہ اے شرکنیں موسم
تئی زہیر ہزیناں گوں پور ءُ استالاں
گش ئے چہ ماہ ءِ نوان ءَ دراتکگیں مردم
تہاری ءَ را اڑیناں گوں پور ءُ استالاں
وتی ہیال ءِ زمستان ءَ آس چاریناں
وت ءَ پہ چاڑ کُدیناں گوں پور ءُ استالاں