کہ جتائیءَ تئی شہرے بہ کناں
ھلکءُ ھنکین ٹہنت
کِشکءُ دگ, منزل ءُ بازار ءُ ندارہ
پدا مردم کاینت
مردمے کئیت تہ نیمون ہزاراں کاریت
سُتکگیں حاجت ءُ دمبرتگیں گِلّہ شنگ اَنت
پیرزالے کہ وتی کْوہنیں گُشانءِ لمبءَ
دُرسیں امروز ءِ گَماں گْرنچ بدنت
یک شِپانکےءِ رمگ گار بہ بیت
راجی داو یے بہ بیت
سر رچیت ھون ماں شیپانی تہا
چار گامءِ سرا سنگر لوٹنت
اسپر ءُ زہم ءُ کَماں، تیر ءُ کٹار
روک بیت آس
پدا آسِن ءُ شورہ شِنگ اَنت
اجگیں کاڑے کہ وداریگیں نگاہانی وتی
کنجلیں زہیراں بہ نندیت ءُ اِدا آپ بکنت
جاہے شَوکار ءُ مُگیمانی طلب چول جننت
جاگہے گُژنگیں زہگانی ابیتکیں دیدگ
چو کہ بے نوریں چراگاں ٹِمبنت
اے وڑیں شہرےءَ پتّو من چتور ایوک باں
ھئو اگاں
من تئی جتائیءَ سُروزے بکناں
بس منی دستءَ بہ بیت
پمّنا زہیروک بہ جنت
بِلّے زہیروک چو گِدانےءِ وڑا ساھگ بنت
لبز پیژگاہ بنت
پیژگاہءَ یک دْرچکے سبزیت
دْرچکءِ چیرا مُدام جِنگُل وتی رازاں ریچنت
راز پیژگاہءَ چہ درکاینت
دگہ میتگے گوناپ دینت
میتگءَ میتگے پِر بیت ءُ پدا شہرے ٹہیت
جیڑِتہ من
کہ جتائیءَ تئی شہرے بہ کناں