منی بیچارگیں پِشّی
ترا اچ من رزا اِنت نوں
برو دیمے
دگہ شھر ءُ دگہ ڈیھے
منی لوگ ءَ نہ گواھیت دانگے لیجر ءُ دنزے آرت
منی جند وت شُد ءَ چنگ اِنت
منی بچّ ءُ جنک ماھیں
شُد ءَ گریونت شپی پاساں
زمانگ وش اِت اَنت پیشی
مَے شھر ءَ ھشتری چہ گوادر ءَ اتک اَنت
ھما روچاں چیا نوں گیرکارئے تو ؟
ترا ھم ھڈءُ کانپولے رس اِت پیش ءَ
مروچیگین ءُ زیکیں گوادر ءَ پرک اِنت
مروچاں ھشتریاں گوادر ءَ نئیل اَنت
نہ زاناں کہ چے گپے ھست گنجیں گوادر ءَ مرچاں
کہ راہ ءَ دژمنانی پوج اوشتاتہ
ءُ ھال اِنت
گوادر ءِ گور ءُ کراں مرچاں
بر اَنت ڈّن ءُ دری مُلکاں
ءُ ھال اِنت
مید بد ھال اَنت
منی بے چارگیں پشّی
ترا اچ من رزا اِنت نوں
برو سر گر
دگہ دیمے
دگہ شھر ءُ دگہ ڈیھے
رس اِیت بلکیں ترا ھڈ ءُ کانپولے
ءُ من ھم سر گراں مرچی
رواں دیمے
دگہ شھر ءُ دگہ ڈیھے
دگہ مُلکے
رس ایت بلکیں منی چُکّانانءَ ھشک ءُ سرتگیں نانے
منی بیچارگیں پِشّی
برو سرگر دگہ دیمے
ترا اچ من رزا اِنت نوں