رون ءَ موش ءَ ھَوار اِنت مئے کِسّہ

رون ءَ موش ءَ ھَوار اِنت مئے کِسّہ

دْروچکے ءِ لڈّ ءُ بار اِنت مئے کِسّہ

وت وتی منزل اِنت وتی کِشک اِنت

جِند ءِ اوستءِ ودار اِنت مئے کِسّہ

نمب زُرتگ سبا ءِ دِیوال ءَ

بیگہ ءِ دست ءَ گار اِنت مئے کِسّہ

ارسیں چمّاں نوانے ءَ ایر کن

شادھانی توار اِنت مئے کِسّہ

تْراولیں پاداں داستانے گوں

جنگے ءِ گالوار اِنت مئے کِسّہ

واب ھنکینیں دِیدگاں پہریز

سوبیں بانداتءِ یار اِنت مئے کِسّہ

پَڈّے ءِ سُنٹ ءَ ایر اِنت کُوکُویے

شانتُلے ءِ توار اِنت مئے کِسّہ

اے کہ دنزانی رُستہ بازار ے

گوں ھمیشاں ھَوار اِنت مئے کِسّہ

دِل اِسحاقؔ جنت ءُ گیپت ، گپّے اَست

چہ کُجا باریں گار اِنت مئے کِسّہ