شپانک

شپ پہ وتی بے وانکی ءِ دْرنگ ءَ ایر دیان اِنت

روچ وتی ہر روچی ئیں ہلک ءَ جُنزانِ اِنت

ڈِرّو! ڈِرّو!

بیاکہ من ءُ تو

۔۔۔راہ گراں

گْوانک بدئے وتی لسہّیں گَڈّ ءَ

(سک پلینگیت)

من وتی ــ’’شیپل‘‘ ءَ شینزاراں

ڈِرّو! ڈِرّو! بیاکہ من ءُ تو

۔۔۔راہ گراں

دم پہ دم ءَ روزردگ ءَ گندئے

چک جنئے

ءُ سکّ من ءَ ارمانی چارئے

ایر روان انت روچ تئی دل ایر رچان انت

شپ پہ وتی بے وانکی ِ درْنگ ءَ ایر دیان انت

رولہی انت تئی ناکو ءِ سہریں چم نہ انت

کہ آچ گروشکاں

چوکہ ترا گندنت انت گوں من

رولہی انت پمن کہ گشئے تئی دست ءِ ہِنّی !

یا…

بلے بلّ!

ہؤ!!

گڑا ذگریں حون منی

گْوانک بدئے وتی لسہّیں گڈّءَ

(سک پلینگیت)

من وتی شیپل ءَ شینزاراں

ڈِرّو! ڈِرّو!

بیاْکہ رواں

شپ پہ وتی بے وانکی ءِ درْنگ ءَ ایردیان انت

پرچیا ارسی بئے،منی بانک

دود ہمیش انت، مئے ءُ تئی ہلک ءُ بولک ءِ

من چہ جتائیں ٹکّ ءُ جتائیں بولکے

تو چہ جتائیں ٹک ءُ جتائیں بولکے

گْوانک بدئے وتی لسہّیں گَڈّ ءَ

(سک پلینگیت سک پلینگیت)

من وتی شیپل، ءَ شینزاراں

ڈِرّو! ڈِرّو! راہ گراں

شپ پہ وتی بے وانکیءِ دْرنگ ءَ ایردیان انت

ہنچ گُشنت تئی ناکو بازیں ملک ءُ میراثے داراِیت

ہنچ گُشنت اے کُلّیں ہلک ءِ اے سجہّیں مڈّی

پیش ءَ کئے زانت کئی؟ مرچاں تئی ناکو ءِ دست ءَ انت

من کہ منی دست ءَ ہچ مالے، ہچ ملکے، ہچ مڈّی یے نیست

من کہ شپانکیوں، وتی زند ءَ شپانکی مرک کنیں

تو کہ وتی ہلک ءِ لاڑک، شرّرنگیں جنِک، زرداریے ءِ چُکّ

انگت تئی دل پہ من ہدوک انت

انگت اے منی دل پتّو زروک انت!

پرچے گنوک انت

گْوانک بدئے وتی لسہّیںگَڈّ ءَ

شپ پہ وتی بے وانکی ءِ درْنگ ءَ ایردیان انت!!

شپ تہ شپ اِنت، ہچ روچ نہ بیت ءُ

من تو روچ ءَ ہمراہاں بیاکہ رواں، بیا راہ گراں

شپ پہ وتی بے وانکی ءِ دْرنگ ایردیان انت

من چو ہمک روچ ءِ پیم ءَ مرچی دی گنوکی تران کتوں

آزارنہ بے

آراہ تئی

آراہ منی

آینت تئی ہلک ءُ ڈیہہ ءُ دوار

او آمنی ہلک ءِ گٹ ءُ گراں

نیں تو وتی گٹاّں جنزاں بی

نیں من وتی دگ ءَ پرّان بیں

کہ گٹّ پہ بوجگ، دگ پہ پرگ، زند پہ ہُشکیں ارمان ءَ

دْراہی ترا بات انت باندات ءَ!!

ہر باندات ءَ کہ گون نہ انت تئی ناکو ءِ شرّیں چک ــ’’دوشکؔ‘‘