تئ زہیرانی ہیروپ ءَ دستے پِر اِنت
(تئ نام ءَ )
من کہ کمّے وثی
نیم گیمُرتغیں
روش ءِ بْرانزانی تْرندیاں پیلُّشتغیں
وخت ءِ ہمراہی ءَ
بام ءُ شَف کفتغیں
واہاویں ارواہ ءِ بالاذ ءَ چمّے جناں
تا گُشئے کہ مئی جیڑغانی زِر ءَ تَرپے اڑسے ءِ بستار ہم گیش بیث
مرشی من نشتغاں
جیڑغا آں ترا
تو مئے ہمراہ نہ ئے
من اوں تہنائی ءَ مرشی سوتے کناں
کہ بہ گندئے مئی توخے ءِ نیم بُندغیں مڑدکا ءِ جبین ءَ
کرارے بہ گیپت
او مئی مہروان!
مئے نہ بودیں وجود ءِ سماء ءِ توار!
ہَو بہ گندئے مئی گالاں بارے سر ءَ
اے تئ پہم ءَ مہ ونت
من اوں گالانی چاڑ ءَ شہ ناسرپد آں
ہَو بلئے،
مرشی زہیرانی ہیروپ ءَ دستے پِر اِنت
تو مئے ہمراہ نہ ئے
اِکّہ تہنائی ءَ من وَ دمبُرتغاں
نی وَ بس اِنت من ءَ
تو بیا ءُ مئی کُلّیں
بے آسریں
جیڑغاناں بُزور
اِیرگیں اکسے بہ کن
کہ مئی ہستی ءِ کُلّیں بے رونکیں
واہاو پدّر بہ بنت
او مئی مہروان!
مئے نہ بودیں وجود ءِ سماء ءِ توار!
مرشی زہیرانی ہیروپ ءَ دستے پِر اِنت
تو مئے ہمراہ نہ ئے
من اوں تہنائی ءَ مرشی سوتے کناں
کہ بہ گندئے مئی
توخے ءِ نیم بُندغیں مڑدکا ءِ جبین ءَ کرارے بہ گیپت
بلکیں تئ بْرمشُکے
پہ مں راہ ءُ درے
پہ مں رُژنائی یے
پہ مں کشکے بہ بیت
اِیرگیں بانداتے ءِ کہ نہ دیستغ کَس ءَ۔۔
اِیرگیں واہاوے بہ بیث زند مانا مہ ویث
اِیرگیں شعرے بہ بیث
زند پہم ءَ مئیث
اِیرگیں ویرَندَنے کہ ہزار ءِ کساس ءَ تہ مڑدم بہ بیث
اِیرگیں مہخانی یے کہ بہ توسیت شف ءَ
اِیرگیں رودیگرے، روش ٹکہ ءَ درئیت
او مئی مہروان!
مئے نہ بودیں وجود ءِ سماء ءِ توار!
تو مئے ہمراہ نہ ئے
من اوں تہنائی ءَ مہر مانا کناں
جیڑغا آں ترا
او مئی مہروان!
تو مئے ہمراہ نہ ئے
مرشی زہیرانی ہیروپ ءَ دستے پِر اِنت۔۔۔۔