شِنگ کن:
یلیں سرمچار
بیل ءُ بْراہندگ ءُ ہمدلیں سرمچار
مہر ءِ حُب ءُ ہدوک ءِ مڑاہ ءُ میار
آجوئی، امینی ءِ صباہ ءُ سحار
تو غلامی ءِ بدوائے مئے سنگت ئے
پہ الس واجہی راہ سپارانی ہمراہ ئے، مئے سنگت ئے
مکہیں گلزمین ءِ یلیں پُسّگان ءَ پہ عاقبت ءَ
ایمنیں زندے ءِ رہ نشان داشت ئے
تو نہ سگّ ات کہ قہر ءِ درآمد بکنت واجہی
مانشانیت پہ زند ءَ بدنت ایردستی غم ءِ
ایر دستانی تو در دوار
یلیں سرمچار
بیل ءُ برْاہندگ ءُ ہمدلیں سرمچار
ڈیہہ ءِ آجوئی ءُ پہ اولس واجہی
یکّی ءُ ستک گوں سرجمی ءَ ہوار
ظلم ءُ زوراکی ءِ آہنی ئیں حصار
ءُ غلامی ءِ سیاہ ءُ تہار
شہم ناکیں سگار
یلیں سرمچار
بیل ءُ برْاہندگ ءُ ہمدلیں سرمچار
تو پہ وت واجہی ءَ زروک
دیدگ ءِ نورءُ چمانی روک
پُرمڑاہیں سروک
توماں آزاتی ءِ جُلگہاں نامدار
یلیں سرمچار
بیل ءُ برْاہندگیں سرمچار