شِنگ کن:
زندگاں داراں ودار ءِ دامن ءَ
من تئی مہرانی شار ءِ دامن ءَ
من دلءَ جزماں چنالے سمبہیت
کیچ ءِ وَیرانیں ڈگار ءِ دامن ءَ
تُنّگیں زرد ءِ بیا ہوشام ءَ بہ بر
گوں وتی چم ءِ خمار ءِ دامن ءَ
تئی طلاحیں درٛوشم ءَ دل کنت یاد
ماہکان ءِ وہدے چارئے دامن ءَ
زندگی لوٹیت بگِنداں نَرمُکیں
بانگوٛاہ ءِ سُہریں شار ءِ دامن ءَ
قہر ءُ مہر ءُ رنج ءُ اندوہ بہر بنت
دل کہ وہدے تو شہارئے دامن ءَ
بے سریں دودانی دُنیا ءِ بُگش
تانکدیں ممتاز دارئے دامن ءَ