شِنگ کن:
ہما کیف ءُ قدّح ہما دل مُلوری ہما نود ءُ بیگاه
بہ کشّیت زِرگوات بہ شنگ اَنت مہپر پدا نود ءُ بیگاه
بہ کش کوش سُہب ءِ منءَ وشیانی دیارءَ ببر گوں
کہ من ہم بزاناں رونت سواد ءُ سئیل کُجا نود ءُ بیگاہ
تئی یا تانی کاپر مروچی ابیتک اِنت منی دل زہیر اِنت
من ارسال کمایاں ءُ ذِردءَ گلایاں وفا نود ءُ بیگاہ
چو کاڑانی ٹولی کہ رُمب رُمب ءَ کاینت گوں دزگہاراں
نوں ہچبر مہ بُرّانت نیادءِ نگاهءَ حُدا نود ءُ بیگاه
مئے قاصد گوں دروتاں کہ لال ءِ نیاتکگ ءُ ترانگ زباداَنت
بہ دنت مارا سوجے کُجا دوست نشتگ کُجا نود ءُ بیگاه
بجل عیؔد دمانے اے مہر ءِ بہارءَ بکن تو نداره
کہ اِمروز وشّ اِنت او بیل ءُ یاراں اِدا نود ءُ بیگاه