شِنگ کن:
اھد زانوگِراں آ تنداں کُتگ
مارا ”پشّانکے“ ءَ کَید ءُ بنداں کُتگ
پہ ما چِلّ سال چی یے پہ آزمُودگی
نکش کشّاں کپتگ، کِشک رَنداں کُتگ
کورسِتکانی دیم ءَ رَدیں مُرشِد ءَ
راست چیر داتگ ءُ دْروگ بَنداں کُتگ
باوَرِیگیں کہ ھوَ رَد کپان ایں مُدام
اے مَلنڈوراں مارا مَلنداں کُتگ
اے سَپر در سَپر، جَلّکیں کِسھے
آبُلہ پاداں دوستی گوں پنداں کُتگ
گنگدامانی اِمروز ”چات ءُ پُگُل“
اَھد ءِ شاھیں سراں ”ماہ کَمداں کُتگ“
ساہ ءُ بَز بُوتگ ءُ تْرونگلی گْورتگ ئے
بستگیں جمبر ءَ کَھر گْرنداں کُتگ
ھچ نہ بُوتگ تہ ءَ بَیدء پُوتاری ءَ
ھر کس ءَ مئے سر ءَ تَژن کنداں کُتگ
دیر نہ۔گْوستگ کہ سْرین پْروش ھم بوتگ اَنت
ھردے زورانسری، زورمَنداں کُتگ
آ بَری بسمل ءَ شئیر گُشتگ پہ تَب
کیگد ءُ کَولیاں ٹَھک ءُ کنداں کُتگ