بہر بہر ءُُ نپس نپس پہ تو

بہر بہر ءُُ نپس نپس پہ تو

یکّے آں من کہ باں دو کس پہ تو

باز کسّءَ وتا کتگ بیگواہ

باز کسّءَ کتگ ہوَس پہ تو

چیر دید اِنت بلےَ نہ اِنت اندیم

اے دلءَ دل نہ کنت کس پہ تو

زندگی انچیں سیمسرےءَ اِنت

نیست کہ بیایاں واک ءُُ وس پہ تو

بلکیں اِشکءَ رسیت پجّارے

پرُشت دودانی ہر کبّس پہ تو

بِیر پہ ما سباہی نمب گُشےَ

تیر بالاد ترمپ ترس پہ تو

من اگاں مُرتگاں تئی لجّءَ

من اگاں زندگاں تہ بس پہ تو

ہر کجا پول بسملءِ ہال اِنت

دراہیں دنیا نشان ڈس پہ تو