شکّل ءُ شہد ءُ شیر بیت کیچ کؤر
اے دل ءَ پہ تو زہیر بیت کیچ کؤر
مولم ءُ یاتاں من کپاں وہد ءِ
بند ءَ میرانی رُستگ انت ببر
چہ نہنگے ءَ زور بیت کیچ کؤر
کوش قلات کوشاں تئی چکن کاریں
دوچ وتاسانی کاباں ڈولداریں
پٹہ ءُ سالونکی ہما کوشاں
نشتگ انت دوچاں وڑوڑیں نکشاں
چنچو زیبا ءُ چنچو دلکشاں
نشتگ انت حاک ءِ کاپر ءِ چیر ءَ
کہ پرشیت دیوان ہمردیں دیر ءَ
سیچن ءَ ایرکنزاں دل ءَ سیاد
وہد ءِ زانتکار ءُ سوہیں استاد
چبہاں دوچاں وہد ءِ سالونک ءِ
آچکن گواپیں پژماں شنگیناں
ہار کیت بنداں کور دپی سندی
کاپر ءُ کرگیناں لتاریت انت
شیپ دگہ رنگاں آپ کاریت انت
عہد ءِ سیلاب ءَ میتگ انت دردی
فیضک ءِ الہانیں شفع گردی
دلوت ءُ مالاں واہ ءُ فریات انت
تنزگ ءِ پلکانی سرئے یات اِنت
مہر ءُ دوستی ءِ گڈی سوگات انت
مجلس ءُ دیوان ءَ پری زات انت
مشکتی حلوہ ہلکہ حیرات انت
گوں ہما درٛاج بُریں وتی شعراں
نوک قلات یارمحمد تئی یات انت
گوں وتی پاگ ءُ چشمک ءَ سیاہیں
گوں کلاکولی چنگُکیں لٹ ءَ
شاعریں عیسی آبسر ءِ براہیں
پرشتگ افغان ءِ آ گلِ ءِ ہوٹل
شاعر ءُ آشوبی مراگاہیں
گوں رمی ءُ ناکو فیض محمد
سبزلی زہیروکاں گوں گلیں سامی
زیمر ءُ مہر ءِ نلیں دریاہیں
عارف ءُ شاہ جان نوک ورناہیں
کہ عطا سنگانی سر ءِ براہیں
کیچ تئی بالاد ءَ ہزار کسہ
آ چنال انگت چو مزن شاہیں
پنو ءِ یاتگاریں قلات پرشتہ
کسہ ئیے کوہنیں دپتراں مان انت
مردک ے بے حال کنت وتی زہم ءَ
باریں چنت سال ءَ بیت دوبر واتر
پوشے دنزینیں اندرا نوک انت
مردکو سیل کنت زہم درنجوک انت
ساہگ ءَ نندیت تئی صداں مردم
تئی چنال نامدار وہد ءِ باہوٹی
سردوے است ات یک گنوکوہیں
دورے کت لہڑانی مزن ہار ءَ
ٹکٹری ٹرالی برتگ انت ٹوہیں
سردو ءَ اوشناگ اوں نزانت جوانی
کنٹگاں شلیں بُراِت ببری
باز گشیت است انت انگت گار انت
سردو انت واجہ خضر ءِ ہمراہ انت
اے وڑیں سیلاب چنت بر ءَ اتکہ
پہ تئی پلیں اے کش ءُ کراِں
خیرو ءُ شیرو ءِ مڑایانی
کاشیگیں کُڈک بستگ اش کرگین
جنگل ءِ لوگ انت آمری یانی
چیزکے جوسک ءِ کشّ ءُ کراں
چیزکے حشک آپیں سری کہن ءَ
چیزکے نشتگ ماں دوکرم ءِ لمب
ٹپو ءُ کاپر بستگ اِش ساہگ
بوتگ انت باہوٹ کہ وتی ڈیہہ ءِ
کہ منی ارواہ ءُ منی ساہ انت
منی بلوچی ءِ براہ ءُ جلوہ انت
دلوت ءُ مال اِش کرتگ بیوپاری
کوہنیں گھڑیال ءُ ٹیپک ءُ ریڈو
پے پُک آہن ئے بہا زرتگ
ہؤ تئی لہڑانی مزن ہار ءَ
چنت منی ماس ءُ چنت گہار برتگ
چنت منی بچیگ گوانزگاں شاگیں
حق ءُ اکبال تو سر ءِ زرتگ
گم تئی تنگہ دروشمیں کوریں
شے مرید سالونک ہانل بانوریں
بند میرانی مرچاں پزوریں
گوں نہنگی ءَ کیچ تی سیر انت
شاعری معراج نام ءَ شوہاز ءِ
زندگیں ہارے دشت مچاتاں
شدری ءِ ہار ءِ کسہ اوں یات انت
گوٛنڈ بگر گالاناں وتی معراج
مرتگ انت شاہ ءُ منتگ آ تاج
(2015حب)