شِنگ کن:
جند ءِ دیار ءَ رستگ ءُ بیگوٛاہ نبوتگاں
یات ءُ زہیراں تُرس اِتگ ہمراہ نبوتگاں
گم ءِ رہسر ءَ میا گوں کورچاتے ءَ کپ ئے
آ چاریں دانک راستیں دل ءِ زاہ نبوتگاں
ارسانی ٹوپ ءُ بمباں جکسینتگ میتگ ئے
حونانی سرزمین ءَ سبزکاہ نبوتگاں
بی برگ ءَ بادشاہے ءَ بورینت کت نہ کنت
گراناز ماں گرانیں واباں اگاہ نبوتگاں
بیگاہاں اتکگ انت پدا سہباں ہُش اتگاں
شیپانی ہار ءُ ہرّگ ءَ دریا نبوتگاں
کپتاں دوبر من کیچ ءِ آمین ءِ ترانگ ءَ
شال ءِ رزان ءِ توک ءَ پیژناہ نبوتگاں
آجوئیں واہگانی منی بوپ ءُ پلنگ انت
سارتیں سکانی گندل ءُ سرجاہ نبوتگاں
وائے پہ ترانگانی منی گران وابی ءَ
بازار سوتک ڈنُگاں! آگاہ نبوتگاں
معراج جلوہ ناک انت امبروز فرشتہ ئیں
چو دلبر ءِ وڑ ءَ منی زیبا نبوتگاں
(2014حب،بلوچستان)