اوست ءِ میزریں بازار ءَ
ساچ اِنت موسمے زہیرانی
چوگان مولم ءِ موج ءَ اِنت
سنج اِنت ترانگ ءِ ذگرانہ
ناچ ءُ صُحبتاں سرْین بستگ
عشق ءِ دلبری تب ساچیں
ستک ءِ کعبہ ئیں آتراپ ءَ
بےسار زندگی گوں واباں
بیتگ مست دہمال ءَ اِنت
گنداں باطن ءُ ہر ذردءَ
دردءِ گِراں تبیں بار اِنت منی
بَڈّ ءُ بے وسیں بردستاں
بے ورد ءُ وراکءُ بےتوشُتگ
سر گپتگ سفر ارواہ ءِ
سنج اِنت مرکبے یاتانی
بالاد بےبلا گوات ءَ اِنت
زہیریگاں سماءِ عشق ءَ
الحانیت شپانی پاساں
تالان اَنت صفت پُرسوزیں
زِندءِ زیمرءِ تارشل اَنت
روک اِنت قندیل اُمیتءِ
ہوشامءِ گدانءَ جّریں
مئے ستکءُ یقینءِ راہاں
وہدءِ شرتگءُ طوفاناں
کشّیت نوں سرءَ روچے کد
شہمیت اے زمینءِ دلبند
شپ گوں جنوزامی شارءَ
پیچیت رؤت کُجا کندانءَ
لرزیت ایوکی ارواہءِ
لُنٹ پہ مہرے تئی لرزان باں
مَا داں قیامت ءَ رہچاریں
مئے زانت ءِ زروکیں ارواہ
اُمّیت ءِ صبا برمش ناکیں
اوست ءِ میزریں بازار ءَ