شِنگ کن:
کسے چے زانت چوں درد واریں دل ءَ گلایاں من
کہ بازیں مُدتے گوستگ چہ مہرنگ ءَ جُتایاں من
شپاں تہنائی ءِ یکشّ ہمے آواز کئیت گوشاں
غمیگ ئے پرچیا اینچو بچار کہ تئی گورایاں من
چتور حال ءَ منیگا اے تیاب ءِ نشتگیں زاننت
ہمُک چول مرک ءِ پیغام انت ہما لُنجیں زرایاں من
جہان ءِ ہوری ءَ گوں دوستی ءِ رہبند بدل بیت انت
بلے ہم ، ہنگتا قائم وتی قول ءِ سرایاں من
مبی حیران منی پُر ارسیں چمّانی سرا اے دوست
تئی مانداشتگیں آس ءَ گوں ارساں توسیگایاں من
من دوست ءِ ترانگ ویاتاں نہ رکّاں داں حیاتی ءَ
دوچاراں گوں وتا ساحرؔ وتی رنگ ءَ فدایاں من