شِنگ کن:
مئے گناہانءَ لِوار آپ کننت
نیک نام اَنت کہ بہار آپ کننت
سنج بنت بور سگار آپ کننت
بیت اگاں کُشت ءُُ کُشار آپ کننت
جی پہ موشنز ءُُ رگاماں لہمیں
کہ چو مُرگاپ کِشار آپ کننت
گلزمینءَ را وتی مات گُشنت
اے مزار بیم تلار آپ کننت
ہؤ ہمے پاس کہ کرنے کرزیت
ہؤ ہمے وہد انار آپ کننت
زہر ءُُ بے زہرگی ارمان بہشت
گواہی اِنت یکزدیں مار آپ کننت
اے ندارگ کجام دشتءَ لُڈّیت؟
کور کنت ہار پتار آپ کننت
بہت کُڈّءَ شکاری ءِ واب اِنت
رُمبے سِیسو کتار آپ کننت
دیدگءِ تران دلءَ ہُلّ رُدیت
دوچ چو نکش ءُُ نگار آپ کننت
بیگہی چاڑ زہیرانی کپوت
پیش چینک ہر سہار آپ کننت
دید آمُرزی ءُُ تُکشوک پہ تو
مُرگ بے برمش ءُُ توار آپ کننت
جی ہما دَور بلوچی زرّیں
ہوریءَ آسک ءُُ مزار آپ کننت
جوہری جنگءِ وڑا اِنت دنیا
گیدیءَ گرد ءُُ گُبار آپ کننت
جُڑ کتہ کوکر ءُُ اِستوناں زِری
تُنّی ئیں ڈیہہ ءُُ ڈگار آپ کننت