او منی ارواہ ہمسفر زندءِ

دلجماں مہر تو کنئے گوں من

دوست منءَ دارئے چو وتی ساہءَ

درد ءُ دورانی تو منی درمان

او منی ارواہ ہمسفر زندءِ

پہ تئی مہراں گران بہائیں من

آسمان گول ات بے وتیں زردءِ

گلزمین پول ات من دلءِ گنجیں

گواز کت درد ءُ دورءِ زر جہلیں

دل ہمے فکر ءُ وسوسءَ گاریں

باریں تئی مہرءِ دروراں یا ناں

پہ منءَ سیتیں باریں تئی امباز

یا کہ تاوانے پہ سر ءُ ساہءَ

یک سوالے کہ پسو ئے لوٹیت

درپشگءَ اِنت شپ بامءِ استاراں

آسمان پراہ اِنت منی حیالانی

گلزمین زردءِ چو بہار گاہ انت

درچک امیتءِ پلءَ سبز تاک انت

روک قندیل اَنت زندءِ اوستانی

دو شش اِنت زند تئی مہرءِ امبازاں

چے کناں دوست ءُ ہمسفر انگت

وہدءِ ناباوری ءُ بے ستکی

چہ تئی مہر ءُ چہ منی عشقءَ

گیش زوراک ءُ گیش توانا انت

پیش منءَ داران انت ہمک گامءَ

دروشماں زندءِ سیہ شپءِ قہریں

او منی ارواہ ہمسفر زندءِ