پادا اُو گہیں ورنا
نز اتکگ و تھامورنت
دنیا پہ شر شورنت
ظالم پہ گل زورنت
پادا، اُو گہیں ورنا!
تئی لٹ و پلءِ سامان
بیتگ گوں مزن نامان
چیر گیھتہ پہ تو دامان
پادا، اُو گہیں ورنا!
ابر ستہ چہار موٹنت
ھڈان و سران کوٹنت
کہسار ترا لوٹنت
پادا، اُو گہیں ورنا!
لجانی وطن پھلین
تئی ننگ انت گراں ملین
کپتگ مں جساں چلین
پادا، اُو گہیں ورنا!
بندر تئی ننگانی
بہر انت مڑو جنگانی
توپک و پشنگانی
پادا، اُو گہیں ورنا!
پادا کہ زمیں سھورنت
ھر سینگ و دل دورنت
بیداد و ھلا مورنت
پادا، اُو گہیں ورنا!
پادا کہ وطن بن گپت
تئی پھلیں چمن بن گپت
تئی کوہ و دمن بن گپت
پادا، اُو گہیں ورنا!
سریں بستہ گوں مزدوراں
گوں شوانگ و مجبوراں
گوں بزگر و کمزوراں
پادا، اُو گہیں ورنا!
پہ پروشگءَ بندانی
زمزیر و کمندانی
پہ سندگءَ تندانی
پادا، اُو گہیں ورنا!
تو زور و تو سامانءِ
دردانی تو درمانءِ
حقانی نگہبانءِ
پادا، اُو گہیں ورنا!
پادا کہ تئی وارنت
یا کٹگ و یا، دارنت
مردانی ھمے کارنت
پادا، اُو گہیں ورنا!
پادا کہ نصیر آھتگ
سریں بستگ و آوشتاتگ
پر تو کلہے داتگ
پادا، اُو گہیں ورنا!