شِنگ کن:
راہسر ءَ درد ءِ حون بنت واہگ مئے حیالانی
زندگی مانیت چو شپ ءِ ساہگ مئے حیالانی
کِلّہ ءَ مہر ءِ تو کدی ناوّلئے دل ءِ دروتاں
آگہی لوٹیت تُستگیں ترانگ مئے حیالانی
طوبی ءِ درچکءَ گوں نصیب بستگ ما وتی درد ءِ
سمبھ اِیت باندا زند ءِ دُردانگ مئے حیالانی
دامن ءَ مہر ءِ داگ دنتیں غم کہ جتائی ءِ
ہو بُتے تراشیت نوکتریں مانگ مئے حیالانی
روچ مئے حاموش، شپ فراموش اِنت چہ وتی جندءَ
بیرگ ءَ گُنگ اِنت چو گُشئے زانگ مئے حیالانی
مئے زہیرانی سینگ ءَ راہے دلسریں بُرّیت
ہلکءَ آ لالءِ چو روگ آیگ مئے حیالانی
مکتبءَ مہرءِ عیؔد منءَ سر کنت سیمسراں شعر ءِ
آ زباد مال ءِ چیدگ ءِ وانگ مئے حیالانی