سوگند اِنت

نہ داراں کینگے دوریں دل ءِ لھڑانی سوگند اِنت

مِراں پہ واھگ ءَ پِسّی گم ءُ بْراتانی سوگند اِنت

ھما اَھد انت منی کہ کسمت اِش ھجبر پْرشگ نیست اِنت

من ءَ آ اومر ءِ ءُ ماھو ءِ کَولانی سوگند اِنت

پہ لجّ ءِ بے بھا بے کیمتیں آ گوھری تْرمپ ءِ

مزن پھریزگ ءَ سُھر گپتگیں چمّانی سوگند اِنت

رُد اَنت ءُ بے وسی ءَ چِست بنت چہ کھر ءِ دریا ءَ

سْیہ مار پیچیں نیلّ بومیں زِر ءِ گْورمانی سوگند اِنت

پہ راج ءِ ھاتر ءُ آزاتی ءِ پھریزگ ءِ دیم ءَ

پہ مَردی وارتگیں ٹپّانی ھونشنزّانی سوگند اِنت

اَدب پیسر کنان ءُ نی اِے گالاں پہ زباں کاراں

من ءَ آ ماھؔوانی پھکیں جیگ بندانی سوگند اِنت

سُچوک ءُ سوزماں داریں کُدوک ءُ باز درد واریں

گم ءِ دست ءَ دوبر تیر وارتگیں ٹپّانی سوگند اِنت

گریب ءُ چورہ ءُ بزکار ءُ بے مات ءُ پِتیں چُکّ ءِ

انارکانی سرءَ ایر رِتکگیں ارسانی سوگند اِنت

نہ سگّ اِیت نی دلوں گیشتر کہ گُپتارانی گال گْران اَنت

اَملّ ءِ واھگ ءَ چِست بوتگیں دردانی سوگند اِنت

دگہ ھم شَھد زبان ءُ دُر بیان باز اِنت کناں کوتاہ

مُسامانی سر ءَ اوشتاں وتی گالانی سوگند اِنت