شِنگ کن:
تنیگہ پاس نہ پُرشتہ کہ بوتگوں تہنا
نوں ماہ ءِ رنگ لَگُشتہ کہ بوتگوں تہنا
گِلگ چراگاں شپ ءِ نوش اِتہ تہاری ءَ
وداراں زندگی دُرشتہ کہ بوتگوں تہنا
ترا زہیراں اَزینتہ جتائی ءِ بلکیں
من ءَ زہیراں نہ کُشتہ کہ بوتگوں تہنا
بِریں داں راہ مہ گیشّیت بِریں داں پاد بَراں
ہمے ہبر مں نہ گُشتہ کہ بوتگوں تہنا
گدارے ارس نہ اُوشتنت نوں ساہگ ءَ چم ءِ
سباہاں زلپ نہ شُشتہ کہ بوتگوں تہنا
تنیگہ تاک نہ کپتہ گوں نگرہیں رِیشاں
اے دیم دنزے ءَ مُشتہ کہ بوتگوں تہنا
بگندئے گیر بیائے ہمے نیام ءَ امین
وتارءَ چنچو شمُشتہ کہ بوتگوں تہنا