شِنگ کن:
آسے بَلَغ ئیں سینغ ءَ ، نئیں زِندگاں نئیں مُڑتگاں
ھردیں تئی وِردیں دف ءَ ، نئیں زِندگاں نئیں مُڑتگاں
کُشتہ مناں یاتاں تئی، پہ نِندغ ءَ نئیلِی زمیں
مں کِجغ آں گوں تئی غم ءَ ، نئیں زِندگاں نئیں مُڑتگاں
اَبدیم شہ ڈیھ ءَ بِیتغ ئے ، باریں کئیا ریفینتغ ئے
تئو دے ھمے زانئے دِلا ، نئیں زِندگاں نئیں مُڑتگاں
چُرت ءُ ھیال تَرَاں دِلا، گوں تئی ھیالاں جیڑغ آں
نئیں دیدغاں وابے شف ءَ ، نئیں زِندگاں نئیں مُڑتگاں
تئو کہ مناں اِشتو شُتئو، تئی پولغ ءَ سوھَوَ نباں
تام تام دِہ ءَ پولاں ترا، نئیں زندگاں نئیں مُڑتگاں
اے آشکِی پَند ءَ ھبیب، چو توکلی رُلینتغ آں
دڑد سُمبغ آں جانئے تہا، نئیں زِندگاں نئیں مُڑتگاں