کس ءَ را نیست ھِچی سما
اے دنیا ءُ زِیندئے تہا
چے ایں ھلال، چے ایں ھرام
چے اِنت روا چے ناروا
کس نہ کَنت کسسی تما
نئیں کہ کسن گوں مسترا
نئیں بَچ گوں آرِیفیں پِث ءَ
نئیں پَج ءَ کاروں بےکس ءَ
ھرکس چو مستیں لیڑویں
نئیں مُچی ایں، نئیں میڑویں
آں وخت وشھالی شُتہ
بِراث ئے گوں بِراث ءَ جیڑویں
مِھرئے ھُدا ءَ لَڈ اِتہ
ڈیھ ءَ وفا ءَ لَڈ اِتہ
لَج ءُ میار پئیری شُتہ
مرشی ھیا ءَ لڈ اِتہ
ڈیھ اِشتہ مُرگی ولھراں
آھُو ءُ گُرک ءُ ناھراں
ھر نیمغ ءَ ایں کُشت ءُ ھون
مڑدم کہ تیغ ءَ رستراں
ھر کُنڈے ءَ زُلم ءُ جبر
نئیں کہ دفاں وشیں ھَوَر (ھبر)
نئیں کہ نیازے، ھاترے
ھر کَس گُشی بس زَر ءُ زَر
نیکی نزانت بس گُناہ
دروہ ءُ دغا، زاہ ءُ زنا
نئیں کہ نماز، نئیں روشگے
نئیں کہ کُرآن اِنت سینغ ءَ
نئیں مجلسے، نئیں کندغے
نیست ایں ھُدائی بندغے
ھِچ نئیں وتی، عیب ئے سما
ھرکس شِی، دوھمی گندغے