آشنا کجائے تو

نُک ھُشتہ چمانی

دل چو گُژنگیں تپل ءَ ھاک شانی کنگ ءَ اِنت

بے ترا چِرتانی برمش ھم نئیت گُوشاں

نا کہ ماھکانی ءَ میتگ ءَ کُچک وَک اَنت

تئی ودار ءَ کِشکانی آزگیں بدن تُوستہ

پُرشت ءُ پُروش ءِ آماچیں زندگی کجائے تو

مُوتک کاراں دروازگ

ژند بیتگاں آدینک

واب شُونز بندان اَنت

کِرم کپتہ تھنائی

ھچ نیست بازار ءَ

آشنائیں مُرگانی مُچی ئے چِدا رپتہ

بیا منی نگاہانی ریگزاریں تُن ءَ کُش

لیبوئے دل ءَ گِر دئے

لیلوکاں ھبر پرما

بیا پدا کُچکانی وکگ ءَ بکن مُلما

ٹپ بیتگیں کِشکانی ودار ءَ درمان کن

زندگی ءِ چُنڈاں رُوپ

تو کہ بیائے دروازگ پُرس ءِ پَتر ءَ پیچاں

سنبھنت دراہیں آدینک

واب ساپ بیان باں

نوک بیت تھنائی

آشنائیں مُرگانی رَم پدا کئیت بازار ءَ

شیر دروشمیں شَر رنگ

زیبناکی ئے چمگ

بیا اے سوتکگیں شہر ءَ کندگانی توماں چَنڈ

پُل کِش ءُ پاتو ریچ

رنگ درنز بازار ءَ

آشنا کجائے تو

بے تو زندگیں مردے مُردگانی پیما اِنت

سک باز تھنا اِنت