جند ءِ جنجالاں گیروشگیں زانتکار
گڈی سگریٹ ءِ نازُرکیں بالاد ءَ پرنچان گُشتانک دنت
جیڑہ بس اِش نہ اِنت کہ گلام اِنت زمین
یا منی ءُ تئی میتگ ءَ آپ نیست
نان پِنڈ اَنت اے مالدار ءُ چہ مادن ءَ پُریں ھاک ءِ سَر ءَ جاھمندیں بلوچ
نہ مئے چُکاں پہ آبانی وانینگ ءَ شَریں ماشٹر رَس ایت
نئیکہ اسکول ھست
نادرھجاہ نہ گواھیت ھچ میتگ ءَ
دگ چش بڈولیں زالبولے ءِ سینگ ءَ ھچ کاری نہ اَنت
ھرچ دو گام ءَ یک کیمپے سرا ءَ پانگ اِنت
اے ھمے ساھت اِنت کہ نوں سگریٹ ءَ زانتکاریں لنٹانی میان ءَ جھان یل کُتہ
شیر چاہ ءَ چہ نیم پُرّیں پیالہ ءِ لنٹ
تند بندان لاوارسیں لھتے مور ءُ مکسکانی گژن ءَ گوں گیروشگ اَنت
دومی نیم ءَ ھمے زانتکار ءِ یک شائر تبیں سنگتے
پُریں پیالھے گُٹ ءَ گران چست کنت ءُ یک شئرے گُش ایت
چاہ ءِ گُٹے گِر ایت
تران بائد کہ دیم ءَ بہ جُنزیت بَلے
سھتے جَل کہ سگریٹ ءِ درپ ھالی اِنت
لھتے کُلّہ بَدئے
یار من لھتے روچ اِنت کہ لاتاں چَٹ ءَ
کیسگ ءَ زَر ءُ بامردی ھچ مان نیست
تو وَ زانئے من ءَ
زَر کہ کائینت کتابانی ارجان بنت
زی یک سیاسی کتابانی نوکیں لڑے "سنگتاں" داتگ اَت
من ھما زُرت نہ کُت
کم نھادیں یک سگریٹی برانڈے بچار
دو ءُ سئے ٹال ءِ زَر وَ ترا گوں بیت
ھرچی کارئے بیار
انی اے نیت ءَ چہ ھمائی ءِ لنٹانی لوٹ ءَ چہ گیش
بس یک سگریٹے ءِ زھریں تام سارت کنت
کئے اے دُھتانی لاڑیں تب ءَ بارت کنت
شائریں سنگت ءَ لھتے سگریٹ گون ءُ پدا کئیت رَس ایت
زانتکاریں بچک نوک روکیں اے بالاد ءَ کَشان گُشیت
یار زلمے نہ اِنت
اے زمین وارساں پہ اے مسکیں ڈگار چنکس درد سَگیتہ
روچ ءُ رھمانی تیر بار بنت اِنت بچک
سیاھیں گاڑی یے کئیت ءُ زمین زادگیں سنگتے چست کنت
چنکس مردم مِریت گوں ھمے رُستگ ءُ لائکیں سنگت ءَ
سرجمیں لوگے گوں گاریں یک چُکے ءَ گار ءُ بیگواہ بیت
دَگ گُشے بُرتگیں مردمانی کھولانی زگرانہ اَنت
ھمدا مردم تُس اَنت
پیریں زالانی چادر اوں پادمال بنت
ارس دارگ نہ بنت
چم چارگ نہ بنت
یات کن یک جِنکے پہ بیگوائیں پِت
سرجمیں زندگی اے دَگاں پانگ اِنت
یک گھارے گوں چنکس اُمیت پہ وتی برات ءَ دلمانگ اِنت
جان سگریٹ تئی مُرت
شائریں سنگت ءَ زانتکاریں بچک کہ نوں جزباتی اَت
یکشل ءَ ھال دات
زانتکاریں بچک ءَ سما کُت پدا
گُڈی سگریٹ ءِ ٹال ءَ کُماریں نگاہ سک دات اَنت وتی
جُست ئےِ کُت شائر ءَ
باریں نندانک ءَ کئے کئے چدا آئیگ اِنت؟
پسو ءَ پیش سگریٹے لاڑیں بدن
سیاھ ءُ زانتکاریں لُنٹانی میان ءَ سَر اَت
من نزاناں بَلے کوم جزباتی اِنت
شاری گوں ھاسٹلے سرجمیں ٹولی ءَ اودا موجود بیت
لھتے سنگت چہ یونیورسٹی ءَ بلکیں اتک
ایندگہ شھرے زانتکاریں سیاسی کواس انگتہ بئے نہ اَنت
من اوں دلمانگاں
شائر ءَ روکیں سگریٹ چاران ءَ گُشت
فیمنسٹاں ءَ دُرست
سیاھ ءُ زانتکاریں لُنٹاں چہ جارے دَر اَتک
کوم ءِ ھال ءَ بچار
پہ گُشان جنگ ءُ جیڑھ وَ جیڑھ نہ اَنت
یورپی لیکھاں گوں دوچاریں بلوچیں جنیناں ءَ بُگش
سَردری ءِ سرا نی کجا جاک بیت
زانتکار ءَ وتی سَر سُرینت ءُ پدا گوں وتا کَند ایتے
مارا اے ساھتاں نی دگہ زالبولانی جنگے کجا واک بیت
شاری جزباتی اِنت