گوات پہ من کلہے لوگی دپ ءَ مانترے؟
لہتے ٹیکی پہ دریگی ءَ ترا گون کناں
تو منی لانکی ئے وشبو ءَ ھمودا سر کن
ءُ پَچیں پَٹ ئے تھا واھگے گرنچ ءَ دور دئے
لوگ ءَ پیسر اگاں کِشکے منی ھال ءَ پُرسیت
تہ اے کشک ءَ منی پادانی پداں ایر بکن
تو اگاں سہتے ھمے لوگے تھا جَلیت کُت
ایریں آدینک ءَ منی اکس ئے جَلشکے پیشدار
کمے اے کُشتر ءَ چارئے گڑا تہت ئے گِندے
ءُ ھمے تہت ئے سرا کِرچکیں گُشان ئے ایر اِنت
تو ھمے کرچکیں گُشان ءَ منی اھوالاں بدے
تو بگش مھر جتیں مرد تئی یات ءَ اِنت
اچ تئی نیمون ءَ وتا سہتکے رَکینت نہ کنت
اکس جوڑینت پدا سرجمیں اکساں دِریت
گوات زاناں ترا اشتاپ ئیں بَلے کمے بِجل
بِل زمین رنگیں جنکے پہ گُشان ءَ کئیت اِنت
لُنٹ لونجان اَنت ءُ دستاں تُشے ھِنی پِر نیست
ھُورکیں چمانی تھا پُروشتگیں واب ئے ایر اِنت
تو زمین رنگیں جنک ءَ اگاں گِندے تہ بگش
تئی تلب رند تری نیمون ئے زمین پیسری اِشک
من اگاں جنگ ءَ نہ مُرتاں تہ پہ تو زندگ باں