سروک راجءِ بلوچستانءِ رھبر
نواب سردار بلوچانی مجاور
وکاب، کرگزاے ڈُونڈوار جرگہ ممبر
پُلوک، لُٹّوک و راہزن راجءِ جَلّات
بلوچ راجءِ کپن کشّ
بلوچستانءِ دلاّل
اے اشمن،
اشمنی سنگت و بیلان
اش اَمئے
گپّ و تران وشیئر و گالاں
چُش بیزار، سکّ بیزار
ماں جان اِش کپتہ لرزگ
ہمے جابر
بلوچ راجءِ کپن کشّ
بلوچستانءِ دلاّل
کہ گندنت مارا، اے کارچ ءَ نہ گندنت
چون ؟ پرچہ ؟
اے زاننت ماپہ ایشاں
پہ ایشانی مزن داشتی وقارءَ
نہ باں ھچبر ، نہ باں وشیں برے ما
پہ ایشاں
لگور، بُزدل ، بگا تُرسنت
ہمے حونوار درندگ
بلوچ راجءِ کپن کشّ
بلوچستانءِ دلاّل
باز تُرسنت ، سک ملُور انت
بہ جان ءَ اِش کپتہ لرزگ
اش اَمّئے گوانک ومستیں توارءَ
سِلاپرّینتگ میدان ءَ جنگءِ
اے چم جھل
بلوچ راجءِ کپن کشّ
بلوچستانءِ دلاّل
مئے گُڈّ ءَ کامرانی ، سوب بوتہ
بیااِت ورنایاں، سنگت و بیلاں
بنداِت سرپ ملُوکاں ، چاپ جنان ءَ
کہ ماسوب کٹّتہ
ھلو ھالو کن اِت او سُہر پوشیں شیرزالاں !
کہ آزات بوتگاں اَش ناپکاراں
شہ گدّار و بلازیریں وکاباں
شہ سردار و نواباں
بلوچ راجءِ کپن کشّ
بلوچستانءِ دلّال
اگہ کسے نہ کنت قدر ءَ زبانءِ
نہ بیت چست طُرّگے نام و نشانے
ترا ننگ است وتی ماتی زبانءِ
بکن خذمت ءَ بلوچی زبانءِ