شِنگ کن:
بارگ بالاد ءُ کمان مِیانیں گُل اَنداماں بِہ بَر
چہ مئے چاگِرد ءَ اِے نازُرکیں سُبک گاماں بِہ بَر
بُرتگ اِش تاھیر زِرد ءِ، زندمان ءِ ایمنی
واھگی بکشاتگیں اِے رنج ءُ چیلاماں بِہ بَر
دِلجماں لَڈّئے چَرے ڈیھ ءَ گلیں، روچے بلے
پیسرا چیریں زمین رَنگیں وتی داماں بِہ بَر
مارا سیہ پوشاں نہ تُرسیت چہ شپانی سیاھی ءَ
تو اِے مَھکانیں شَپاں ءُ روشنیں باماں بِہ بَر
پہ، پُرانیگ ءَ کَھِیری بُنڈ پُلک، بے مِنّت اَنت
زِیر وتی وشّیں وَراک ءُ شِیرکنیں تاماں، بِہ بَر
دل نہ شُشتگ ما چہ اُمیت ءَ بھار ءِ موسم ءِ
چہ مئے زید ءُ کھچراں بے بودیں ھزّاماں بِہ بَر