شِنگ کن:
بے بهاریں بهار پیداک انت
بے کراریں کرار پیداک انت
ڈاه دیاں کورءَ داشتگیں مرداں
وهدءِ توپانیں هار پیداک انت
هشکیں دستاں گوں باریں ارماناں
کاسدءِ راهوار پیداک انت
کنت بے جستءَ ملکموتءِ میار
گینگریں بے میار پیداک انت
داشتگ انت پرچا وهدءَ ترندیں رواج
کئی وشیں توار پیداک انت
بارءُ سربار اِش کیگدءِ زهیر انت
اشترانی کتار پیداک انت
کَے بدنت هانلءَ سید هالے
که تئی امیت وار پیداک انت