چپ نہ بان

تاں زِندگان اُو دشمنِ جان! چپ نہ بان

داراں مں دپءَ، تَریں زباں، چپ نہ بان

بے شک تو بکش، ظلم بِکن، آس بِجن

من دارءِ سرءَ حقءَ گوئشاں، چپ نہ بان

پِرونکے نہیاں من، کہ چو یکدم بسچاں

من شمھیاں، تاں سہب بلان، چپ نہ بان

تانکن، وَتی زِردءِ چہ زرابءَ مَدھِیان

دشت و جَبلان، آچِشے مان، چپ نہ بان

سر چیرو تباہ، تانکں مئے وَرنا مکننت

سرمایہ پرسِتانی جہان، چپ نہ بان

تانکں چہ وَتی واھریءِ کِشتءَ دِھقان

امنءَ گوں موارت، لنکہے نان، چپ نہ بان

لاپ سیرو پہ آرام، مَبنت، تانکں تمام

مئے گشنگیں بگجت و شِواں، چپ نہ بان

تانکں مگوئجاں، اچ بن و بیحءَ، مکنان

بوتاراں وَتی گار و زیان، چپ نہ بان

مارا شَت و زِندان کدی چپ کرت کننت

تِیرانی درھدیں ھَورءِ شلان، چپ نہ بان

دِل سوھتکگ و جان دور، جگر کپ و دو کپ

ساہ تانکں بتءَ زرگِے مان، چپ نہ بان

من رِندی ئیں قولے گوں نصیرءَ بستگ

آزات بِیان یا کہ مِران، چپ نہ بان