چے کناں

ٹَھل ءُ نازانی زُومّ سریں تیراں چے کناں

دِل کُج اِنت؟ سوگاتاں اگاں زِیراں چے کناں

پَشت نہ کپت پمّن ماڑی ءُ پُر دَھلیں زمین

کوہ ءُ زِر سوچیں بْرتکگیں بِیراں چے کناں

انگت ھم چَکّاساں ملندْ روھاں واھگ ءِ

ھانؔل ءِ اندوھاں اگاں پیراں چے کناں

جمبراں سْیہ بستگ گروکے ھم شَھم نہ کنت

شپ چو کِیلّ ءَ اِنت منزل ءَ دیراں چے کناں

تھلیاں تِنگاناں تئی ھوشام اِنت من ءَ

پہ اَدارُکے شَکّل ءُ شیراں چے کناں

آس کپات کُلّ ءَ کہ نئیت کُلّانی سپاہ

بوپ ءُ بالشت ءُ پوپل ءُ ھیراں چے کناں

ماں گُجام باگ اِنت ھپتگاں پَشّوکیں انار

اَمب ءُ نارنج ءُ تْرنج ءُ اِنجیراں چے کناں

رنج ءُ اَندوھانی دوار جاہ اِنت دل منی

من مُرادانی شاھی منگیراں چے کناں

گم جَتیں کُلّ ءَ گوں دل ءَ جیڑاں شر تِر اِنت

وشّ ءُ شادانیں بان ءُ باجگیراں چے کناں