چِینچو دیوانگیں مَردم منی راہ ءَ کَپتہ

چِینچو دیوانگیں مَردم منی راہ ءَ کَپتہ

ھَو بِگندئے مئے گنوکی نوں سَماہ ءَ کپتہ

من وتی جِند نزانتہ ءُ نہ دیستہ من وت ءَ

نوں کہ زاناں اے گنوکی منی ساہ ءَ کَپتہ

وت گَلا مرچاں زبان اوں تئی باھوٹ نہ بیت

چونیں کِردے اے تئی سَر کہ پہ زاہ ءَ کَپتہ

تو کہ بے ھال کُتہ دُور بُشوھازے بُرو

پُرشتگیں دل منی اَنگت ھما جاہ ءَ کَپتہ

شانتُل ءَ نالگے الھان کُتہ چِینک نہ چِنت

بلکنہ بَر ءِ کھیر نوں سَر ءُ شاہ ءَ کَپتہ

شاگ دریا ءَ نہ لُڑّیت ءُ نہ چُکّیت چولاں

ھَملوں اَھد ءِ منی سَنج سِلاہ ءَ کپتہ

مَٹ اِتہ رنگ پد ءَ موسم ءِ تَبگواتیں لَد ءَ

میتگ ءِ گْوات پہ نازے چہ تَماہ ءَ کَپتہ

کوریں رَہ دَربَر ءِ ھمراہ ءُ مَھاری ءَ فضل

مَردمے دوشی پدا میتگ ءِ چاہ ءَ کَپتہ