شِنگ کن:
چراگے روک کنت نندیت بِزاں گُنھگارے
کسے کہ شئیر بِہ بندیت بِزاں گُنھگارے
ھما کہ اَھد ءِ زھیراں گوں اَرس پالا ایت
ھما اوں سرشپ ءَ کندیت بزاں گُنھگارے
شپانی آگھیں پاساں اگاں دل ءِ زید ءَ
زھیری جمبرے گرندیت بزاں گُنھگارے
اناگہ ءَ کہ شپے دروشُمانی پیژگاہ ءَ
شِپاریں مھپراں رندیت بِزاں گُنھگارے
پتے پہ تاسُپیں بَچّانی گاری ءِ اُزر ءَ
سَباھاں ماسگے بندیت بزاں گُنھگارے
گمانی مغرب ءِ سھت ءَ یا روچ ءِ روزرد ءَ
شپانکے مھلباں تندیت بزاں گُنھگارے
اے وھد ءُ نوبتے اَنچیں ترا وتی لوگ ءَ
دو روچ ءَ یکے مہ گندیت بزاں گُنھگارے
ھیاتے شات ءِ شُھاز ءَ اگاں پہ بے ھالی
دونانی جیگ ءَ بِہ سندیت بزاں گُنگھارے