شِنگ کن:
چُوکی شمگاں گار بی گندئے
ھشتے ٹگلیت چار بی گندئے
آپ ءَ گوں نہ آس ءَ گوں پدی بیت
گواتے کہ سزاوار بی گندئے
مال واجہ ءِ مڈی وتی جند انت
دُز دُز ءِ شریدار بی گندئے
آ کس کہ کس ءَ مان میاریت
وت جند ءِ گماں گار بی گندئے
وش گوش کہ سراں گار ءُ گسر کنت
سازندہ گناہگار بی گندئے
ھر مردم ءِ ساہگ دگرے بیت
ھر بندہ گناہگار بی گندئے
گیوارءِ شم ءَ آبرہے کش
تیگی رہے کاٹار بی گندئے
سانجارہ نہ سنجانی بدل بیت
چوں رامٹو آچار بی گندئے
ارسانی تلاوگ سر ءُ چیر انت
دردے دل ءِ پاہار بی گندئے
بے عمر بگندئے عمرے جنت
بے لج چوں حیا دار بی گندئے
قاضیؔ اگاں شعر ءِ ہنر ءَ زانت
دولبز دو گپتار بی گندئے