دوشی مں حیالے نوکیں
دیستوں مردمے لُڈّوکیں
زیبا حیر پرے مہتوسیں
مرگانی وزیر طائوسیں
لال من ہمسراں وت شاھیں
داب انت ہمو گمراھیں
سہت و زیوران زیبائیں
وت گوئیں قبولی ماھیں
کل ءَ گورکیں سرساھیں
اِستاراں گل ءِ دیمائیں
نینکہ پہ جدائی راہیں
کندیت ءُ رچنت مروارد
جزیت گل زمین روک ءَ بیت
ما مں شادہ ءَ وابیگ ءَ
شیری تِنگ اِتوں دوست ءِ رَکّ
واب ءَ اچ کتوں سدھ ءُ سار
میری نرمگاں پریناں
زیران کُنگر ءُ کشتیاں
بِینگی گُلڑُّے گوں گیجان
من پہ در در ءَ جکان ءَ
سارتین ٹُکران پَنڈان ءَ
بینگی گُلڑ ءَ پالان ءَ
حونی ءَ کنان چو رفتار
پئیاں بخمل ءُ تئی بلگار
دوست ءِ پژدر ءَ کنیزیناں
گُراّنٹے جتوں درویشی
دوست چہ ہیمو ءَ پاد آہتہ
دست بہ آرزاھاں مشتہ
پردیسی فقیر ءَ گُشتہ
لال من اندوھاں پیلوشتہ
دوست ءَ دست نشانے داتہ
گم گشتیں دلے بود آہتہ
رفتار ءَ پئیاں گیگینتہ
زلفاں زرہ بریں تیگنتہ
چمان چو مثالے سوہیں
چوکہ آچراگ مشروہیں
باگانی برے وشبوئیں
دیستینئے پھرنگانی سر
دیم ءِ درنگتنت مروارد
آندی ءَ عتیقے مان ات
گریہہ مں تنگویں ھاران ات
سیہ مار و لہر ءُ لکھ ءُ جو
دست ءَ اژملیں فیروزو
مارا مں دل ءَ ھست ئے تو
اندیم ءَ مکن یک کترو
شانگو شادہ و شنگو ما
عیناں ءَ کتوں جُتک وتا
واسے گپتگاں پازیبان
متہاپ ءِ پیاپیں گیگان
موجیں دل منی باگ بیتہ
یک شاح ءَ ہزار شاح بیتہ
ہر شاح ءَ ہزار شاح بیتہ
ہر شاح ءَ وتی گُل بیتہ
گُلاں تازگیں رنگ بیتہ
چم ءَ را چراگے بیتہ
حونی ئیں کتابے ونتہ
دوروکان کنے درمانے
نوکر من تئی فرمان ءِ
دکانین گور و ھاران ءِ
نازان کم کنے زور آور
تیگی ناوک ءُ بازیگر
نیکی اَچ تئی دستاں در
گور ما پیالہے زپتیں ور