مروچی منی دل عجب چال کنت
عینان زیری نظر خیال کنت
بیکاں رندی برے لوڑ کنت
گل ءِ پٹ براقے منا جوڑ کنت
دوست مہربان بی ، من دیوانہ نیاں
وت ءَ یال کنت ءُ مجالہ مراں
نگوشدارت بیلاں جام ءِ زارھاں
کہ ایش ءُ ہمیش اِنت من تئے گُشاں
نہ حق ھیبت ءَ کیت من چنچوں کناں
سوحتکہ من ءَ لال ءِ ڈکھ ءُ غماں
من گوں کے فراقاں تئی بھر کناں
بروتو ہمود ءَ کہ دوست جال(۱) کنت
برجان او بندی صدے سال کنت
چو بندی دری ءَ سر ءَ سا(۲) ءَ کنت
دل ءَ دوست داریت دپ ءَ دعا ءَ کنت
کلیں مسلمی(۳) کن اِت باور ءَ
روحوں تُنگّ اِنت پہ ہمے روھبر ءَ
ہرچی گناھے کُلّ ءِ من کتہ
اولاک پھرنگین جتہ بار کتہ
سر ءَ داں منی گوشاں جتہ گار کتہ
نگوشدارت بیلاں جام ءِ زارھاں
کہ ایش وَ ہمیش اِنت من تیئے گشاں
جیہر جڑ ءُ مال ءِ رعدیں گروک
چہ دیر مِزّلاں بیاہان برجان جنوک
چو کایاں کھرا مان ءَ کاھنی آپوک
زیبدار کنان بنت جان ءِ گہاں
بول ءُ پلوہ ءُ وتی ڈاوناں
پیلوشگیں شار ءُ پٹیں براں
بیکاں، رندی گوں وشیں چراں
گیوار ءِ نیام ءَ جنت عطراں
بازیں زھیراں من تالاں کناں
نگوشدارت بیلاں جام ءِ زارھاں
ایش وَہمیش اِنت من تیئے گشاں
طوطا کہ نندے من بان ءِ سر ءَ
بر مئے سلاماں پہ واسطہ خدا
بردئے گل ءَ را ماں کُل ءِ دپ ءَ
بر دئے گُل ءَ را من روچ ءُ شپ ءَ
کنڈی ءُ پوہی کنت من گور ءَ
توئے چاردہی ماہ من ماہ ءِ گب
توئے روچ نیمروچ من ایر لواں
توئے گردگیں بگ من گھوڑواں
حاکاں لیٹے من تئی چتراں
پاداں شپادے من تئی لتراں
توئے سیاہیں سیہ مار من جوگی سراں
مندراں جنان ءَ من دست اِت گراں
نگوشدارت بیلاں جام ءِ زار ھاں
کہ ایش وَ ہمیش اِنت من تئے گُشاں
مروچی منی میان ءِ تیگ ءَ گُلیں
کہ واسکارہ جام ءِ کش و ھنبلیں
آندرا مندرا تئی سہت تنگویں
آسکی گریہہ ءُ تئی چم کدھیں
نہ سوھنت گل ءَ را گل ءِ دلبری
ہمے سہت و سوھنا گلیں سومری
اَمل ماہ ءِ برجے من سیاھیں شپاں
اَمل ماہ ءِ چیلک من کُہکراں
اَمل زحم رچوکیں من کوپگاں
نگوشدارت بیلاں جام ءِ زارہاں
ایش وَہمیش اِنت من تیئے گُشاں
گالاں نگوشدار اوجام ءِ جگر
کوڑی فناھیں دُنیا جاک دَر
کسے ءَ نہ بُرتگ دنیا توڑہ سر
توئے جیٹھڑے مناں سونھ سر
من باگاں گچینی توئے باگ ءِ بر
اگہ تو نیائے تہ وت زان ئے تہ
چہ زبریں زبان شاعرءِ حال بی
سچیت جان جام ءِ بہا نال بی
گھڑی عاشقان ءَ گوزگ سال بی
نیں پجہ نیارئے من جام دُرّک آں
کہ اَچ ڈومبگیاں من سر سستگاں
-----
۱۔ وتاک ۔ ۲۔ ساہگ ۔ ۳۔ مسلمان۔