شِنگ کن:
گِروک ءَ بے جُڑ ءَ کُلّ ءِ دَپ ءَ شَھم اِت دوبر دوشی
پد ءَ کُرت ئِے منی پُر مِھنتیں دل چیر ءُ سَر دوشی
من زانت اَت بُندر ءَ تئی سوج ھمبل پمّن تاوان اَنت
اَمُلّ ءِ ماھیں گوناب ءَ کُت اَنت دْرستیں ھَبر دوشی
من ءَ یات اِنت گُل ءِ جیگ تر کُت اَت ارساں منی آسیں
گْوشئے ایر اَت ھما رنگ ءَ منی شیدائیں سر دوشی
جگر بْر یجاں کہ گُڈّ چَہ سے سد ءُ پنجاہ ءُ شش روچ ءَ
اناگہ رھگْوزی پہ ھانؔل ءَ کپتگ بِزَر دوشی
مہ بَئت چہ شکّلیں گالاں منی ھَیران یلیں بیلاں
منی مھمان بوتگ شَھد لُنٹیں گُل شکر دوشی
بکن دلگوش دْرھباتانی گال اَنت سوز ماں داریں
کہ پتلگ گُڈّ چہ تو ماں انگر ءُ آساں جگر دوشی
سَیؔد گنجیں اُمیتانی کَلات ءَ دلجماں اَنگت
کہ آتکگ کَسملیک ءِ پمّن سے رَند ءَ نَپر دوشی