دیستگ اَت

من پرندوشیگیں واب ءَ ملگزارے دیستگ اَت

ملگزار ءِ دامن ءَ باگی انارے دیستگ اَت

من نہ زاناں کہ کئی بھت ءُ نسیب ءَ جَھ جتگ

زی گمانی کاروان ءِ من کتارے دیستگ اَت

ھمرھاں چہ سِستگیں مردانی رنگ ءَ بے وسیں

کاروان ءِ دنز ءِ دیم ءَ من گُبارے دیستگ اَت

دست بنداں کہ وتی ٹھلانی لَھڑاں کم بکن

کہ پَمے راہ ءَ من چکّپْر وشیں تلارے دیستگ اَت

دُژمنے زاناں پہ لال ءِ ھاترءَ پیداک کتگ

دوشی واب ءَ بے دَمیں یک سیْاہ مارے دیستگ اَت

کم نہ بیت بے ساری گَھگیریں سر ءُ موجیں دل ءِ

من نہ زاناں اِمبری چونیں بھارے دیستگ اَت

رَد چُشیں نہ وراں سیؔد من دُمپر ءَ، یات اِنت من ءَ

گڈّ چَہ شش ماہ ءَ من ھانؔل پہ گِدارے دیستگ اَت