شِنگ کن:
اے کیا مارا چوشیں راہ ءَ بُرت
درد ءُ رنج ءُ غمانی جاہ ءَ بُرت
گپّ نہ منّ اِت سر ءِ ھُدا بُند ءِ
تئی بزرگی ھمے گناہ ءَ بُرت
نیں تہاروکی ءَ بکن دَزمُوش
گوں وت ءَ ماھکانی، ماہ ءَ بُرت
دُرست رد ءَ کپت اَنت کہ شَکین دیما!
ہوش اِشانی تئی دیم ءِ براہ ءَ بُرت
وش ءُ آسیدگی جَبِینّانی!
تنگو ءِ میڑگ ءُ، طِلاہ ءَ بُرت
مارا رَھدَر براں نَزَانت کاریں
زند ءِ جَنگ جاہ ءَ بے سلاہ ءَ بُرت
کپتگ ءِ بے وسی ءَ، نیں ساحرؔ
گوں وت ءَ تئی تمردی ساہ ءَ بُرت