کپت جارے کہ جھدوں پہ سر شت
کینگ ءِ کارچ کئی دل ءَ در شت
بلکیں نیمونوں ایرجیگ بہ کنت
دلجمیں کار ءُ کار دربر شت
یکبرے شت گوں دروتاں ربّالو
پسّو ءِ ترس ءَ ساھوں سدبر شت
بے سریں راج ءُ بے سریں سودا
جھندم چہ بادگیر ءَ کاپر شت
آتکگ باریگ لج بریں زر ءِ
دوستی ءُ مھر ءِ دور آسر شت
شال پیسر سگار ھرجان اَت
دیناں بے سیت ءِ گنجیں گوادر شت
بانگ پہ بانگ اِنت ترا کہ سیر چینک ئے
راج ءِ جوھان ءُ پلیں آس بر شت
پہ منی مرگ ءَ بمبئیں کلاں
گل کتگ بے ریائیں گْوھبر شت
نال ءُ ماندار بلاں میتاپیں
او کپوت، زند ءِ کل کپودر شت
دیم ریزات مرگ ءُ میران ءِ
کہ چہ اندوھاں واھگ ءِ در شت
پرچا ایر جیگ ئے ھانل ءِ نام ءِ
زاناں زانت ءُ سما اِت برادر شت
گل ءِ گوناب ءِ ساھگ اش دیستگ
چہ دلاں ماہ ءُ ماہ درور شت
زندمانی نزوریں نیمونے
گوں سری سوباں ساھوں پیسر شت
راستی ءِ بام ءَ جورکاں داتگ
مال شت ملک ءُ مھتریں سر شت
وژدلیں جارے کپتگ مرت سید
موتک دستونکاں راھدربر شت