شِنگ کن:
گیش کن ٹَھلانی گونڈلیں تِیراں
دل مَبات اِنت اگاں من دلگیراں
تْرانگ اِش دات من ءَ زباد بو ءِ
چِست کن اِت زَپتیں پوپل ءُ ھِیراں
درد واری منی کُت اِش پولنگ
آس کپات اِنت ماں باگی اِنجیراں
واھگ ءِ سوزمان کمّ نہ بیت
پْروش اُمیتانی شاھی باجگیراں
تئی کُلّ ءِ تہ ءَ اِنت ورنائی
کئی مَیار اِنت کہ بزّگ ءُ پِیراں
بے شکر گال ءَ شیر کنی تَھل اِنت
رِپچ اِت مِزری ءُ شکّل ءُ شِیراں
واھگ اِش مُرتگ ھرچی سر بوتگ
شُگر اِنت انگت چہ منزل ءَ دِیراں
منی پُشت ءَ گمانی زِین سیتّگ
چے کناں وشّیانی منگِیراں
زاناں آس گْواریں جمبرے بند اِیت
چِیزُّکے روچ اِنت تَم کُتگ بِیراں
ھانؔل ءِ دوستی ءَ سَیؔد اَنگت
گْراں تِریں گَم وتی سرءَ زِیراں