من پد ءَ کُجا چہ بْیاراں ھما گْوستگیں بھاراں
دل ءِ سَولیں باگ دیر اِنت منی سوتکگ لواراں
چہ من ءَ مہ لوٹ همبل ھما وشّیانی یاتاں
من ءَ پْروشتگ ناگُمانی گَم ءِ بیمّ دَھیں مزاراں
دل ءَ بود کُرتگ نوکی چہ اَمُلّ ءِ دَرد ءُ دوراں
پد ءَ مَلّ اِتگ دو دیمی پمن ءَ گمانی ھاراں
دل ءِ ٹَپّاں آزگیناں تو مچار ءُ تیر گْوارین
پہ تئی آسکی دیدگاں من دگہ دل کُجا چہ بْیاراں
منی ھمبلاں! تلاہ اَنت شمئے سوج بے وساں من
کہ گوں تِکّواں بداراں چتور پْرشتگیں تلاراں
کئی بے گمی ءِ کار اَنت کئی بے سری ءِ کار اَنت
کہ چو ساربان ءَ تَرّاں من گوں سِستگیں مھاراں
من ءَ دست کُمک مَہ بے تو منی بْرات گونگیں دوست
کہ مروچاں من ترا ھم وتی دژمن ئیگ ءَ چاراں
من ءَ بِلّ کہ سر جناناں وتی ھانؔل ءِ شوھاز ءَ
چہ کس ءَ نہ لوٹاں سوجے کہ من زاناں راہ ءَ گاراں
پہ اِے تُرس ءَ پَتّو واھگ دگہ مھنتے میار اِیت
من ءَ مِھر گونجنان اِنت کہ سَیؔد ترا تواراں