گُڈّ چہ شش ماہ ءَ

گُڈّ چہ شش ماہ ءَ آتک منی واب ءَ ہوش بَر

کُرت ئِے ماں نھنگامے دل ءِ دنیا چیر ءُ سر

روچ چو کِیلّ ءَ اَنت بے کہ آمھدیمیں گُل ءَ

شپ منی چو کہ دُور بُنیں چات ءُ ژِیمبّ ءُ گَر

بیرگیں ٹاپارے جَتَگ شَیدائیں دل ءَ

نا اُرُودیں پنتاں گُتگ جِندوں دَر پہ دَر

آزگیں ٹپّانی نہ بنت زیمیگ ھَمبِلاں

اَنگر اَنت ھیر واریں دَپانی شھدیں ھبر

تئی گماں جَتکی چُپتگ ءُ شِنگینتگ من ءَ

انگت ھم جَوریں دُژمنانی کَھر اَنت نِزَر

پہ سر ءُ چمّان اَنت من ءَ دِلبُرّیں زَھیر

ندر ءُ کولیگاں چمّن اِے سوگاتاں مہ بَر

تنُگّیں چمّاں زی منی مستاگے چِتگ

ھانؔل ءِ راہ ءَ مرچی چیر گیتک اَنت شانزدہ بَر

موسمی ھورئیگ ءَ بَگْوار اِیت اِنت وژدلی

بیت منی شیدائیں سر ءُ موجیں دِل پہ دَر

سَبز چو اُمبوھیں کھیرئیگ ءَ بوتگاں

نوں تْرِپ اَنت ھر روچ پمّن ءَ الماسیں تَپَر

کَدّھیں چم وت شریمگ سا اَنت اَنگت ھم

چہ منی بھت ءِ کَنجلاں ماں کَشت ئِے دو سَر

دَرد ءُ سوزمان ءُ مھِنت ءِ تاموریں دْرد اَنت

کہ پمّن کاینت بے امانی روچے دو بَر

تَھل ءُ جور ءُ کُچّل ءُ ماجین تَرّ اِت اَنت

شکّل ءُ شَھد واریں دَپانی شیر ءُ شکر

زُومّ سریں گوندوچاں گَم ءِ دوتکگ دِل منی

پہ دگہ سازے ستگ ءُ گچّ گچّ اِنت جَگر

یا کہ بئیت یک ماتکوہ گْوجیں سْیہ گْواتے پمن

یا زمین ماتیں تو من ءَ تْرکّ ءُ ایر بَر

دل گْوشئے ایر اِنت زِھزِھیں سِنگانی سرءَ

کہ لگتمال کَنت ئِے گُل ءِ بے سیتّیں نَپَر

گوں وت ءَ زیران ءُ بَراں دِل بُرّیں گماں

پہ منی آس ءُ انگریں گالاں ھم مہ زَر

دُر اِبابتّیں دوستے ءِ سَوگند اِنت سَیؔد

بوتگ ھر مردے واھگ ءِ رھبنداں گِسر