شِنگ کن:
کیا غم ترا دات
کیا دل تئی پروشت
کیا زندمانی ءِ!
واھگ تئی پیلوشت
کیا دستاں مان کت
تئی گرانیں سانکل
ھمبل کیا کُت !
تئی جیگ تل تل
ترا واری ءُ بزّگی اِے کیا دات
کیا چوش پیسکینت تئی مکھیں مات
پُشت ءَ کیا جت تئی زانت ءُ زان
کیا بُرت، تئی چاکری ٹھل ءُ شان
کیا چیر ترّینت ترا ءُ تئی نام
چے پیم ءَ تو بیتے گلام ءُ ملام
لگت مال کھچر کیا تئی کت اَنت
گوال ءُ گورم کجا تئی شُت اَنت
چیا مَچّ ءُ نیبگ تئی گیمرتگ اَنت
ولاّنی بر تئی کیا سِستگ اَنت
دودانی بدواہ ءُ دژمن کئے انت
نادِلسرے تو بلے ایمن کئے اِنت
دْراہ ءُ وداراں کئی نشتگ ءِ
باھوٹ ءِ تحت ءِ چیا وپتگ ءِ
وتی ھَلک ءُ مُلک ءَ وت دست بگر
گُل ءُ پُلیّں راہ ءَ دوبر سربِگر