شِنگ کن:
تیر ءُ تفنگ اِش زُرتگ اَنت
کاٹارِش میاناں بستگ اَنت
پُلّیں یل ءُ بیل اَنت منی
زند ءَ وتی سر گْوتگ اَنت
چہ ھوناں چراگ اَنت روک کناں
زاراکی ءِ سیاھیں شپاں
منزل بہ منزل گام جناں
چو آس ءِ زراب ءَ سرپتگ اَنت
پادموش کنان اَنت ڈَنگراں
سر بر گوزان اَنت کنڈگاں
دیر اَنت چہ وشّیں شادھاں
شتکیں تلاراں وپتگ اَنت
باج بُرتگ اِش چو کوکر ءَ
مثل گروک ءَ شھم کناں
جِند اِش کتگ قربان وتی
کوھیں ھسار اِش پْروشتگ اَنت
پُچ دِرتگ ءُ پاداں شپاد،
سُھر اَنت اِش چم بے وابی ءَ
ھم دست ءُ ھم گام ءُ تپاک
کوٹ ءُ کلات اِش کپتگ اَنت
دلگوش کن اِت بیل ءُ یلاں
راج ءِ منی کیمیا گراں !
بیا اِت کہ وشّیں زند کئیت
ورنا مرادے سر گِراَنت
وت واجہ ءُ جوانیں سراں
شوھازؔ کنت سُھریں سلام
بیرک بلند بات اِنت شمے
گال من دوئیں پربستگ اَنت