شِنگ کن:
ھرچی آبے دَروَر ءِ پرمان بیت
گپّ ھما مارا سَر ءُ چمّاں بیت
سَر کُتگ سَر گوات ءَ ڈیھ ءِ کوچگاں
جنت گِروک ءُ جمبر ءُ ساچان بیت
اَلّما رؤت ءُ رسیت پہ منزل ءَ
آ، کہ گاماں تُرندی ءَ کشّان بیت
تو ھم چو غیر ءَ کہ پُشت ءَ پِر کنئے
زند ءِ تیلانکانی کئے دیمپان بیت
اَچ ”سر ءُ حیز ءَ“ وتی دست کشّ بئے
گرانیں مشکل دُژمن ءِ آسان بیت
کدِّ بوچّے ھم دل ءَ گواھی نہ دات
مَرگ چو ڈیھ ءَ گُلیں ارزان بیت
ھَنچُش اِنت ساحرؔ کہ گُشتگ عاقلاں
درد کہ حدّ ءَ گوزیت درمان بیت