شِنگ کن:
گُشنت کہ ہچ مگش تو
بہ نندءُ بس ندارہ کن
وتی کریابیں چاگردءَ
گلابءُ ستکگیں پُلّاں
بچار زوراکیانی دوزہءِ بُن گپتگیں آسءَ
گداناں، گورگیں کُلّاں
بہ گند ہرچی بلے چُپ بُو
زئیپیں پیرزالاں بِل کہ بچانی غماں کوراَنت
فراموش براتءُ سنگینیں گہارانی دلءِ آہاں
شموش دردانگیں بچانی جہدءَ رِتکگیں ھوناں
وتی پُلّیں شہدانی مگرنامءَ
مہ جیڑ پہ راجءِ فرزنداں
مہ نازین سُرمگیں کوہاں
تیاباں، کہنءُ شہجوہاں
گیاباں، سیرکگیں وڈّاں
پچیں میدانءُ آپ بنداں
مہ ساڑا مکہیں ڈیھءَ
بلوچانی بُنءُ بیہہءَ
بہ نندءُ بس ندارہ کن
گشنت کہ ہچ مگش تو