ھِچّ نہ لوٹاں

ھِچّ نہ لوٹاں من کَسے ھور بہ بیت تئی گَم ءَ

کُشتگ من ءَ ھمے گم ءَ بھر اِنت ماں کُلّیں آلم ءَ

جُست ءَ نِزوری ءِ مکن کہ گوں ارادہ ءَ تُساں

گُل چو بھاری مورتے رُستگ ماں کوہ ءِ سَرشَم ءَ

ھچ کِمار ئِے ھم نہ کُت داب کنان ءَ راہ گپت

من وتی درد ءُ مھنت ءِ کُرت بیان سرجم ءَ

راست بات تئی ھَبر بلے چنچوں گَل ءَ نہ مُرت اِتاں

کَیت پہ دْرواھی ءِ پدءَ من کہ بزانتیں المّ ءَ

واھگ ءِ رنج اگاں مہ بیت امروز ءِ گم سرءَ پْرش اِیت

دنیا اِنت کوڑھیں اِدءَ کسّ نہ نشتگ بے گم ءَ

ساھتکے نہ گْوستگ اَت دل پہ ھُنر تْرھینتگ اَت

ھانؔل ءِ تْرانگ ءَ پد ءَ گپتگ من ءَ را بے گْوم ءَ

واھگ ءِ راہ ءَ اَے سیؔد کسّ ءَ میار نیست اِنت

چہ وت ءَ پھک ءَ گار بیت ھر چی کپ اِیت اِے رم ءَ